Haber un facilitate plus grande in un lingua non es le mesme
cosa que haber iste lingua como lingua native. Le facto que le anglese es
"injuste" in le communicationes international se debe al domini
native que alcun personas ha de illo. Interlingua, anque si plus facile a
alcun personas, es lingua native de necuno. Illos es cosas completemente
differente. Si on vole un lingua que non da NECUN advantage a alcuno, on debe
adoptar un lingua equalmente alienigena a omnes.
Comocunque, iste obsession equalitari, commun a multe
personas qui parla linguas auxiliari e in le base mesme de alcun de iste
linguas, parte del principi que un lingua, assi como un comunitate de
parlatores es un tabula rasa que pote simplemente adoptar un nove lingua,
comenciar ab zero. Ego es completemente contra iste vision del mundo, sia in le
linguistica, sia in le vita in general, pro isto ego seligeva parlar e promover
interlingua, e non altere lingua como esperanto. Interlingua parte ab le
realitate e non ab desiros completemente aleatori de un persona. Vide,
comocunque, ego non dice que interlingua es perfecte, ma illo es le minus
defectuose de omne linguas auxiliari.
Iste specie de obsession al equalitate in le aspectos
linguistic de un lingua auxiliari ignora completemente multe aspectos del
linguas in general e prende un puncto de vista unic como le veritate absolute.
Illo es un specie de complexo de Fourier linguistic.
Interlingua, anque se non ben intelligibile a omnes, es le
lingua plus intelligibile possibile al maximo numero de parlatores.
Il ha anque un parte objectiva del comprehension linguistic,
il ha elementos que es particularmente plus facile a omnes, independente del
origine del personas. Le linguas isolante e analytic, pro exemplo es plus
facile qualcunque sia le lingua native de uno. Le scriptura chinese es
objectivemente plus difficile que un alphabeto.
On debe memorar anque que nos parla de un lingua auxiliari,
non de un lingua native. Le personas nasce con le capacitate de apprender
qualcunque lingua on parla in su medio, ma un lingua auxiliari, sempre
apprendite in circumstantias differente, debe limitar se al characteristicas
plus simple e universal.
http://commons.wikimedia.org/wiki/File:Spqrstone.jpg
0 commenti :
Posta un commento